Acts 24

Bulus Gni Nna Romayi Ikoda Abye

1A bwa anyipyei ngun-atnu Hananiya ɓedo a yahudiyi abyeda yi n Tetullus yi ɓa lo I Kaisariya. Ɓa ɓe ntu ge ɓa da Bulus alaifi. Hananiya nu ɓei zhin prist dnagmayi, Tetullus Bei zhin loya nu. 2Shi Gwamna ɓo yi Tetullus ge wa da Bulus alaifi wa gna, “Shekwo mwasa, eyi a Yahudiyi yi kpe lo ge ho la salama, n loloya yi ga yi n ho kni.

3“Ntu deye ɓo a da yi lo n mwa. 4Yi ta ye ya wun ho sa ya m, amma yi ɓa ye ha wo yi, nɓa da anya n ɓa gna yi gna-gna n Bulus yi. 5Wahala gayi nu n woi, wo ku zhin a Yahudiyi vinya ɓai la gyikici ka, ɓai zhin gaba na Romayi gwamnati yi. Wo nu zhin a Kristi yi tukwoda. 6Wo ɓo zhin atna wa tu aduwa nyakun cegye ya wan wo. Yi ɓo ye ya da wo owa bisa ga eyi adini.

7“Amma Lisiyas asoja tukwoda wa wo gwo n ya kun na kala yi. 8Wa gna aɓa da Bulus owa bisa ga a Romayi wyidna Ho ɓa wo gaiciya n wohin aba.”

9A Yahudiyi vinya ɓa fi aku, ɓa gna, enya n Tetullus ku da nyi gaiciya nu.

10Kwa si Bulus sa, Gwamna wa gna wo ge wo laka wa daɓo. Bulus wa gna, “Shekwo mwasa hoi mi kpe lo ge ho la mwasa hoi da a Yahudiyi owa aye yi mwa begye, ada mi lo.

11“Nya mi ye ma da nyi kwo ɓa wu ho ge, ma lo Urushelima ntu mwa-mwa ga ɓo nu, anyipyei awo-cei-aba nɓa duya nyi. 12Ho ɓa gye njesun ge, mi to shin gyikici kala la ko aduwa nyakun, ko ezhi doho-dohoyi m. 13Aza deye ta mi ɓa ga seda, ntu anya ɓo n ɓa da ge ma zhin nyi m.

14“Enya mi zhin waʼazi tu ko cici okwonu zhin gni gni zokwo. Okwo nu n ɓa gna wuwu nukwoyi. Mi zhin ma zhin Shekwoyi bauta shi eyi a zakwoyi zhin. Mi gaiciya yi ga a Yahudiyi owa, na nyai vinya n ɓa kafi anabi a littafi nyi. 15Mi gaiciya yi ga n efi kalaku n vingwo, a ɓefye-cei ɓedo aza nukwoyi, ɓahin lo nu ce. 16Ntu aɓo deye ɓo mi zhin atna n mi akala yi vinya, ma zhin ɓo ko bmiya n Shekwoyi abye, na za yi.

17“Mi ɓo la gmiya na ye yi mwa begye, ma je ze ɓe Urushelima na gyiwyei shi ma bma a Yahudiyi zhin, ma zhin sakirifais ga Shekwoyi. 18Aza deye ɓo gye ml na sakirifais zhin ba nu. Mi la tukwo wun shi owa da. Zaho-zahoi to ɓei gni n ma ba m gyikici to ɓo nyi m, amma a Yahudiyi ho a Turki ɓei zhi ɓo. 19A Yahudiyi ye, ɓei gna ɓa zhi lo n ya, ɓo da laifi n ma zhin.

20“Aza deye ɓo sun mi, mi yi zhin kni ɓe nukwoyi nuʼa? 21Enya Pi gmanyi nu n mikpe lo, n mi ɓei da na wada ba ge, ‘Mi gni ai da mi owa ntu efi kalaku ɓo nu n vingwo.’ ”

22Fileks kpe lo ge a Kristi yi ta la gyikici ka m, ntu ce nu wa gna Yahudiyi ge ɓa ku pmi sai Lisiyas la e kafin wo zo ɓeda. 23Wa gna a je ze lo n Bulus yi n kurkuku, amma a gye ɓa nuwan n woi daidai, a fa owo anugundo ɓa ɓe wo aba ɓa gye wo, ɓa ga wo anya ntu ge wa bwa agmada.

24Anyipyei fyewyi avun Feliks wa ɓe n Dirasilayi owo nyikwo, wo ɓei zhin Yahudiyi za nu. Ɓa tnu Bulus ɓo ntu ge wa gna ɓa Yesu ɓeda. 25Wa daɓo nɓai tu efyece ɓo, n ɓemanayi zhin yi, n wa da yi nkwo ɓo lo nyi. Feliks wa wo dna shi wo ɓo wo aɓeye. Wa gna Bulus ge, “Lo kpa nɓa je ho yi mi la esa bwa.”

26Wa gye ngye Bulus ɓa ga wo toshi, ntu ce nu wa tnu wo ɓo cici woi daɓo n woi. 27Wa gyi abye woi yi Bulus nasasayi, har aye ngun-aba. Amma Bulus to ɓei gawo toshi m, Avun a shan Feliks do, abe n Posho Festus yi. Feliks woi ye ge a Yahudiyi ɓa bwa agmada n woi, wa Bulus fa dna n kurkuku.